PARLEZ-VOUS SUISSE? è ina cuminanza da lavur d'organisaziuns che s'engaschan per la promoziun da la diversitad linguistica e culturala en Svizra sco era per la chapientscha vicendaivla tranter las cuminanzas linguisticas. Cun la fundaziun da PARLEZ-VOUS SUISSE? vul la cuminanza da lavur contribuir ad ina discussiun publica pli animada davart questas tematicas.
La cuminanza da lavur sa basa sin la persvasiun che la diversitad linguistica e culturala è ina schanza irremplazzabla e da gronda valur per l'avegnir da la Svizra e che sia promoziun è ina premissa per la convivenza paschaivla en noss pajais.
Las finamiras da PARLEZ-VOUS SUISSE? èn cuntegnidas en ina plattafurma communabla cun dudesch tesas. Quellas èn decisivas per las activitads che las organisaziuns realiseschan communablamain u era independentamain. La cuminanza da lavur è averta ad autras organisaziuns interessadas.

L'avrigl 2004 ha il cussegl federal decidì da renunziar per motivs finanzials a la nova lescha davart las linguas e la chapientscha vicendaivla, che era previsa per garantir il mandat constituziunal (art. 70 ). Perquai s'engascha la cuminanza da lavur actualmain per ch'il cussegl federal revocheschia questa decisiun e suttamettia la lescha uschè svelt sco pussaivel al parlament per la deliberaziun e l'approvaziun.

Las decisiuns per las activitads da la cuminanza da lavur vegnan prendidas da la radunanza plenara. La Fundaziun linguas e culturas ed il Forum Helveticum, ils iniziants dal project, èn responsabels per la coordinaziun.

«PARLEZ-VOUS SUISSE?» (PDF)

Persuna da contact:
Gianni Ghisla (Fundaziun linguas e culturas), Paolo Barblan (Forum Helveticum)

e-mail: pvs@pvs.ch / homepage: www.pvs.ch